Monday, November 16, 2015

去陳奕迅山扮陳奕迅




去印度因為妹尾河童,
去西班牙为咗唐吉訶德,
新疆有王洛賓,撒哈拉梗係三毛啦。

咁香港咧?
为咗陈亦迅,得冇?







我問 Wendy 知否醫神個張 《 Taste the atmosphere 》邊度取景?

唔似香港喔。

係大東山,醫神影咗大碟封面之后,人哋就嗌佢做陈亦迅山咯。

With that reason, I'm coming to Hong Kong。

Yeah,记得带爬山鞋。

我稱呢 D 為旅人嘅浪漫 ( 或烂漫 )。






呢把年紀仲可以浪漫,亦有 D 本錢浪漫,
都唔可以話唔幸福。

既然有人帶路,唔记路线喇。( 懶得我吖 )

一路轉車又轉車,直達半山腳下,
實在好方便。







十二月尾係 Wendy 阿峰大囍之日。

四年前嚟大馬,佢哋冇 feel,
四年後兩人竟然要結婚,
上帝俾你嘅,總係預料之外果個,
就好似我从来未諗过嚟香港,最後来咗一样。

咪同上帝玩嘢。






天陰,風大,氣溫好涼,
冇辦法影日照金山了。

旅行從來都无法掌握分寸,如夢一場。






中意呢座山,莫名其妙中意,
有時中意一樣嘢真係冇乜理由。

好似我同你咁。

大東山令我諗起馬來西亞嘅茅草山,
呢度比茅草山大得多,山上遍佈嘅其實係芒草,非茅草。
茅草山早已嚴重污染與開發,面目全非,
大東山反而乾淨,亦安靜,遊人雖多,但唔擠逼。

滿山金黃色嘅芒草,隨風輕輕搖曳,沙沙聲響,
多麼溫柔嘅色彩,回頭望,山下遠方,遼闊大海。






早就忘記《 Taste the atmosphere 》有乜歌曲,
印象中呢張碟唔係太完整同禁聽,
會買完全係為咗封面,陈奕迅企喺一大片草原上瞭望,就咁買低。

愛大草原,愛遼闊空曠嘅所在,
似乎咁就可以化解悲傷,親愛的,你因乜而哀傷?






2010 年嘅大碟。

5 年就咁過去,無聲無息,驚濤駭浪。

5 年前和她種下從此不相往來嘅際遇,
5 年後遇上依家嘅她,和她完全唔同嘅她。

5 年前大佬仲喺度,我哋一起飲咖啡傾生命,
5 年後大佬去咗一個永遠無眼淚嘅地方,留低只有緬懷,

5 年前啱啱結束 4 個月嘅旅行返嚟,
5 年後想去嘅地方未去到,反而去咗一堆未諗过要去嘅地方。

譬如,香港。






大東山由伯公坳開始,南山結束。

越爬越疲倦,汗流浹背,比想像中難爬,
其实唔算太高,但係因為陡斜,用嘅力自然多咗。

越往上攀升,霧就越大,白茫茫一片乜都睇唔到,
雖然唔係期待中嘅陽光燦爛,卻有另一種淒美。






你問我點解嚟香港。

就為咗心中嘅大草原啊。

傻佬你說。

原來香港都有大草原。






到達山頂,一間間石頭屋仔迷霧中冒現,煞是奇特。
慧芝話係以前傳教士修行嘅屋仔。

大老遠搬運石頭嚟到山頂只為建造修道院,
古人嘅思維真令人费解。

唔通咁做比較接近神?






好耐未試過咁傻。

只為一座山,一首歌,一本書,一個人而踏上旅途。

揾唔返 5 年前嘅自己。

當時,我是否比較快樂?似乎都沒有。






粗糙樸素的石頭屋仔於人安心感,
太精緻和過度裝飾嘅世界令我日趨倦怠,
沒完沒了嘅產品,日新月異嘅設計,永無止境嘅進化進化再進化。

好攰。

退化,其實係保留最初。






退化。

回歸三葉蟲,回歸寒武紀,回歸盤古開天闢地,
回歸十億年前你我最初嘅模樣。

你唔係你,我亦唔係我。

那樣會比較快樂嗎?






五個人癲咗半日,開始落山。

落山竟然比上山更攰,

從來抵達容易,離開難。






阿峰係個體貼嘅人,

每当我半途俾路邊風景吸引發呆離隊嘅時候,總會發現佢在等我,

哎,真唔好意思,其實我習慣亂行,絕對唔會荡失。

Wendy 能夠遇上你係福氣,
你會適時拉佢返嚟。






落山路好長好長,隻腳痛到失晒知覺,
這樣一場,為乜。

突然諗起 Wendy 分享過,佢同阿峰曾經就似一首歌 《 高山低谷 》,


你快乐过生活     我拼命去生存     几多人位于山之巅俯瞰我的疲倦
   你界定了生活     我侮辱了生存     只适宜滞于山之谷整理我的凌乱 ”


我太過俯瞰,你過於仰望,都唔會有結果,
唯有雙方願意一个下降,一个向上,先至可以聚于一點。






我已經冇聽陳奕迅。

亦唔再買任何大碟,依家 D 音樂唔係以前我聽嘅音樂。
依家嘅世界唔再係我以前了解嘅世界,
係我變得太慢,抑或係世界變得太快?






嚟陳奕迅山揾大草原,
嚟陳奕迅山扮陳奕迅。

終於揾到佢影相個兩間石屋仔,企喺中間,我笑了。

為咗依然未消散嘅自己。

我依然係原來嘅我,
原本就悲傷,亦冇什么好悲傷嘅我,
依然係果個追求草原,嚮往空曠的少年阿叔。



1 comment:

  1. [只為一座山,一首歌,一本書,一個人而踏上旅途。]

    我最喜歡這一句。。。^__^

    ReplyDelete