去陳奕迅山扮陳奕迅

去印度因為妹尾河童，
去西班牙为咗唐吉訶德，
新疆有王洛賓，

撒哈拉係三毛。

咁香港咧？
我为咗陈亦迅一张唱片封面。

問 Wendy 知否醫神張 《 Taste the atmosphere 》邊度取景？

係大東山，醫神影咗大碟封面之后，

人哋就嗌佢做陈亦迅山。

For that reason, I'm coming to Hong Kong。

Yeah，记得带爬山鞋。

我稱呢 D 為旅人嘅浪漫 （ 或烂漫 ）。

呢把年紀仲可以浪漫，

绝对係幸福。

既有人帶路，我就唔记路线，
一路轉車又轉車，直達半山腳下，
其實好方便。

十二月尾係 Wendy 阿峰大囍之日。

四年前嚟大馬，佢哋冇 feel，
四年後兩人竟然要結婚，
上帝俾你嘅，總係預料之外，
就好似我从来未諗过嚟香港，

最後来咗一样。

天陰，風大，氣溫好涼，
冇辦法影日照金山。

旅行從來都无法掌握分寸，如夢一場。

我中意呢頭山，
有時中意一樣嘢真係無需理由。

好似我同你咁。

大東山令我諗起馬來西亞嘅茅草山，
呢度嘅其實係芒草，非茅草。
茅草山嚴重污染，面目全非，
大東山仲乾淨，亦安靜。

滿山金黃色嘅芒草，

隨風輕輕搖曳，沙沙聲響，

回頭望，腳下遠方，遼闊大海。

大東山由伯公坳開始，南山結束，
越爬越疲倦，汗流浹背，

比想像中難，
其实唔算太高，但係因為陡斜，

用嘅力自然多咗。

越往上攀升，霧就越大，

白茫茫一片咩都睇唔到，
雖然唔係期待中嘅陽光燦爛，

卻有另一種淒美。

早就忘記《 Taste the atmosphere 》，

2010 年嘅大碟，
會買完全係因為封面，

陈奕迅企喺一大片草原上瞭望，

好靚，就咁買低。

愛大草原，愛遼闊空曠嘅所在。

5 年就咁過去，

無聲無息，驚濤駭浪。

5 年前同佢不相往來，
5 年後遇上另外一個佢。

5 年前大佬仲喺度，

5 年後大佬去咗一個永遠無眼淚嘅地方，

留低只有緬懷。

到達山頂，

一間間石頭屋仔迷霧中冒現，

煞是奇特，
聽講係以前傳教士修行嘅屋仔。

大老遠搬運石頭嚟到山頂只為建造修道院，
古人嘅思維真令人费解。
唔通咁做比較接近神？

粗糙樸素的石屋仔令人安心。

你問我點解嚟香港，
就為咗心中嘅大草原，
你話我傻佬，
原來香港都有大草原，

好耐未試過咁傻。

只為一座山而踏上旅途，

即使揾唔返 5 年前嘅自己，又如何。

癲咗半日，開始落山，
落山竟然比上山攰，
阿峰係個體貼人，
每当我半途發呆離隊嘅時候，

總會發現佢等我，

真唔好意思。

Wendy 能夠遇上你係福氣，
你會適時拉佢返嚟。

落山路好長好長，

隻腳痛到失晒知覺，
咁辛苦，為乜。

突然諗起 Wendy 分享過，

佢同阿峰曾經就似一首歌 《 高山低谷 》，

“ 你快乐过生活，我拼命去生存，几多人位于山之巅俯瞰我的疲倦
   你界定了生活，我侮辱了生存，只适宜滞于山之谷整理我的凌乱 ”

一方太過俯瞰，

一方過於仰望，

都唔會有結果，
唯有雙方願意一个下降，

一个向上，先至可以聚于一點。

我已經冇聽陳奕迅，
亦冇再買任何大碟，

依家 D 音樂太浮躁，
係我變得太慢，抑或係世界變得太快？

嚟陳奕迅山揾大草原，
嚟陳奕迅山扮陳奕迅，已經好滿足。

為咗依然未消散嘅自己。

我係我，
感性，脆弱，敏感，細膽，

聰明，勇敢，開朗，自信，
依然係果個追求草原，嚮往空曠的少年阿叔。